துபாய் / மே 5 — வளைகுடா பகுதியில் ஹோர்முஸ் நீரிணை மீது கட்டுப்பாட்டை பிடிக்க அமெரிக்காவும் ஈரானும் திங்கள்கிழமை புதிய தாக்குதல்களை நடத்தியுள்ளன. இரு தரப்பும் கடல் மறியலில் ஈடுபட்டதால் சமீபத்தில் ஏற்பட்டிருந்த அமைதி ஒப்பந்தம் பாதிக்கப்பட்டுள்ளது.
பிப்ரவரி மாதம் முதல் அமெரிக்கா மற்றும் இஸ்ரேல் ஈரானுக்கு எதிராக தொடங்கிய தாக்குதல்களால் இந்த முக்கியமான எரிசக்தி கடத்தல் பாதை முற்றிலும் செயலிழந்த நிலையில் உள்ளது. இந்தப் போர் காரணமாக ஆயிரக்கணக்கானோர் உயிரிழந்துள்ளனர்.
அமெரிக்க அதிபர் டொனால்ட் டிரம்ப் திங்களன்று “ப்ராஜெக்ட் பிரீடம்” என்ற பெயரில் சிக்கித் தவிக்கும் கப்பல்கள் ஹோர்முஸ் நீரிணை வழியாக செல்ல உதவும் புதிய முயற்சியை தொடங்கியதையடுத்து, ஏவுகணை மற்றும் ட்ரோன் தாக்குதல்கள் அதிகரித்தன.
அன்றே பல வர்த்தக கப்பல்களில் வெடிப்பு மற்றும் தீ விபத்துகள் ஏற்பட்டதாக தகவல்கள் வெளியாகின. அமெரிக்கா, ஈரானின் ஆறு சிறிய ராணுவ படகுகளை அழித்ததாக தெரிவித்தது. அதே நேரத்தில், ஐக்கிய அரபு அமீரகம் நாட்டின் ஒரு எண்ணெய் துறைமுகம் ஈரான் ஏவுகணை தாக்குதலால் தீப்பிடித்தது.
“ப்ராஜெக்ட் பிரீடம்” குறித்த விவரங்களை டிரம்ப் தெளிவாக வெளியிடவில்லை. அமெரிக்க சட்டப்படி காங்கிரஸ் அனுமதி பெற வேண்டிய காலக்கெடு கடந்துவிட்ட நிலையில், போர் முடிந்துவிட்டதாக அவர் தெரிவித்தார். ஆனால் இதை சில சட்டமன்ற உறுப்பினர்கள் மறுத்துள்ளனர்.
கடந்த மாதம் அறிவிக்கப்பட்ட தற்காலிக போர்நிறுத்தத்திற்குப் பிறகு, இந்த முக்கியமான கடல் பாதையை திறக்க ராணுவத்தை பயன்படுத்திய முதல் முயற்சி இதுவாகும். ஆனால் ஈரானின் இஸ்லாமிய புரட்சிகர காவல்படை அனுமதி இன்றி எந்தக் கப்பலும் செல்ல முடியாது என கூறியுள்ளது.
இதனால் கப்பல் காப்பீட்டு செலவுகள் கடுமையாக உயர்ந்துள்ளன. அமெரிக்க கடற்படை பல வாரங்களாக ஈரானின் கடல் வர்த்தகத்தைத் தடுத்து வருகிறது. இதையே ஈரான் போரின் ஒரு பகுதியாக கருதுகிறது.
டிரம்பின் புதிய நடவடிக்கை எதிர்பார்த்த பலனை அளிக்கவில்லை. கப்பல் போக்குவரத்து அதிகரிக்காமல், ஈரானின் எதிர் தாக்குதல்களை தூண்டியுள்ளது. முக்கிய கப்பல் நிறுவனங்கள், முழுமையான அமைதி ஒப்பந்தம் வரும் வரை காத்திருக்க முடிவு செய்துள்ளன.
ஈரான் வெளியுறவு அமைச்சர் அப்பாஸ் அராக்சி, “இந்த பிரச்சினைக்கு ராணுவ தீர்வு இல்லை” என்று தெரிவித்துள்ளார். பாகிஸ்தான் நடுவராக அமைதி பேச்சுவார்த்தைகள் நடைபெற்று வருவதாகவும், அமெரிக்கா மற்றும் ஐக்கிய அரபு அமீரகம் தேவையற்ற சிக்கலில் சிக்கிக்கொள்ள வேண்டாம் என்றும் எச்சரித்துள்ளார்.
அமெரிக்கா தனது கடற்படை உதவியுடன் இரண்டு வர்த்தக கப்பல்கள் ஹோர்முஸ் நீரிணையை கடந்து சென்றதாக தெரிவித்துள்ளது. ஆனால் ஈரான் இதை மறுத்துள்ளது. அதே சமயம், மேர்ஸ்க் நிறுவனத்தின் அமெரிக்கக் கொடி ஏந்திய “அலையன்ஸ் பாற் பாக்ஸ்” கப்பல் கடற்படை பாதுகாப்புடன் நீரிணையை கடந்ததாக கூறப்பட்டுள்ளது.
அமெரிக்க கடற்படை தளபதி அட்மிரல் பிராட் கூப்பர், ஈரானின் ஆறு சிறிய படகுகள் அழிக்கப்பட்டதாக தெரிவித்தார். இதையும் ஈரான் மறுத்துள்ளது.
ஈரான் தனது கட்டுப்பாட்டில் உள்ள கடற்பரப்பை விரிவுபடுத்தியதாக ஒரு வரைபடம் வெளியிட்டுள்ளது. இதில் ஐக்கிய அரபு அமீரக கடற்கரையின் ஒரு பகுதியும் சேர்க்கப்பட்டுள்ளது.
தென் கொரியாவின் “HMM Namu” கப்பலில் இயந்திர அறையில் வெடிப்பு மற்றும் தீ விபத்து ஏற்பட்டது. ஆனால் இது தாக்குதலால் ஏற்பட்டதா என்பது தெளிவாக இல்லை.
பிரிட்டன் கடல் பாதுகாப்பு அமைப்பு இரண்டு கப்பல்கள் தாக்கப்பட்டதாக தெரிவித்துள்ளது. மேலும், ADNOC நிறுவனத்தின் காலியான எண்ணெய் கப்பல் ஈரான் ட்ரோன் தாக்குதலுக்கு உள்ளானது.
ஈரான் தாக்குதல் – அமீரக எண்ணெய் துறைமுகம் தீப்பிடிப்பு
நாள் முழுவதும் அமீரகத்தில் ட்ரோன் மற்றும் ஏவுகணை தாக்குதல்கள் நடந்ததாக தகவல்கள் வெளியாகின. குறிப்பாக புஜைரா துறைமுகத்தில் தீ விபத்து ஏற்பட்டது. இது ஹோர்முஸ் நீரிணையை கடக்காமல் எண்ணெய் ஏற்றுமதி செய்யும் முக்கிய இடமாகும்.
இந்த தாக்குதல்கள் பெரிய பதற்றத்தை உருவாக்கியுள்ளதாக அமீரகம் தெரிவித்துள்ளது. தேவையான பதிலடி கொடுக்க உரிமை இருப்பதாகவும் கூறியுள்ளது. பாதுகாப்பு காரணமாக பள்ளி மாணவர்களுக்கு ஆன்லைன் வகுப்புகள் அறிவிக்கப்பட்டுள்ளன.
ஈரான் அரசு தொலைக்காட்சி, “அமெரிக்க ராணுவத்தின் நடவடிக்கைக்கு பதிலாக அமீரகம் தாக்கப்பட்டது” என்று தெரிவித்துள்ளது.
இதற்கு முன்பு, ஹோர்முஸ் நீரிணைக்கு அருகே வந்த அமெரிக்க போர்க்கப்பலை எச்சரிக்கை சூடு மூலம் திருப்பி அனுப்பியதாக ஈரான் தெரிவித்தது. ஆரம்பத்தில் தாக்கியதாக கூறிய தகவலை பின்னர் திருத்தியுள்ளது.
நிலையைக் குறித்து முழுமையான தகவலை உறுதி செய்ய முடியாத நிலையில், இரு தரப்பும் முரண்பட்ட தகவல்களை வெளியிட்டு வருகின்றன.இந்த பதற்றத்தின் காரணமாக எண்ணெய் விலை 5% அதிகரித்துள்ளது.ஈரான் தனது கடற்படையுடன் ஒத்துழைத்து மட்டுமே கப்பல்கள் செல்ல வேண்டும் என்று எச்சரித்துள்ளது. “ஹோர்முஸ் நீரிணைக்கு வர முயலும் எந்த வெளிநாட்டு ராணுவத்தையும் தாக்குவோம்” எனவும் எச்சரிக்கை விடுத்துள்ளது.
நான்கு வாரங்களுக்கு முன்பு அமெரிக்கா மற்றும் இஸ்ரேல் தாக்குதலை நிறுத்தியிருந்தாலும், அதன் பிறகு நடைபெற்ற அமைதி பேச்சுவார்த்தைகள் முன்னேறவில்லை.
ஈரான் 14 அம்சங்களைக் கொண்ட ஒரு முன்மொழிவை அமெரிக்காவுக்கு பாகிஸ்தான் மூலம் அனுப்பியுள்ளது. இதில் போரை நிறுத்தி, கடல் பிரச்சினையை தீர்த்த பிறகு அணு திட்டம் குறித்து பேச வேண்டும் என்று கூறப்பட்டுள்ளது. டிரம்ப் இதை நிராகரிக்க வாய்ப்பு உள்ளதாக தெரிவித்துள்ளார்.
சமீபத்திய அமெரிக்க உளவுத்துறை தகவல்படி, ஈரானின் அணு திட்டத்திற்கு பெரிய சேதம் இல்லை. ஈரான் இதை அமைதிக்கான திட்டம் என்று கூறினாலும், அமெரிக்கா அதிகப்படியான யுரேனியம் சேமிப்பை அகற்ற வேண்டும் என வலியுறுத்தி வருகிறது.
