அமெரிக்காவின் வர்த்தக வரிகள் காரணமாக, ஜெர்மனியின் கார் ஏற்றுமதி பெரிதும் பாதிக்கப்பட்டுள்ளதாக ஜெர்மன் பொருளாதார ஆராய்ச்சி நிறுவனம் IW தெரிவித்துள்ளது.2025 ஆம் ஆண்டின் முதல் ஒன்பது மாதங்களில், அமெரிக்காவுக்கான ஜெர்மன் கார் ஏற்றுமதி சுமார் 14 சதவீதம் சரிந்துள்ளது. இதனால், அமெரிக்க அதிபர் டொனால்ட் ட்ரம்ப் முன்னெடுத்த வர்த்தக மோதலில், ஜெர்மன் தொழில்துறைகளில் மிக அதிகமாக பாதிக்கப்பட்ட துறையாக வாகனத் துறை மாறியுள்ளது.
வாஷிங்டன்–பிரசெல்ஸ் இடையே ஏற்பட்ட ஒப்பந்தத்தின் படி, ஆகஸ்ட் 1 முதல் ஐரோப்பாவில் இருந்து அமெரிக்காவுக்கு வரும் கார்கள் மீது 15 சதவீத அடிப்படை வரி விதிக்கப்பட்டது. இது, முன்பு அறிவிக்கப்பட்ட 25 சதவீத வரியைவிட குறைவாக இருந்தாலும், ஏற்கனவே இருந்த 2.5 சதவீத வரியுடன் சேர்ந்து ஜெர்மன் கார் உற்பத்தியாளர்களுக்கு சுமையாக அமைந்துள்ளது.
ஜெர்மனியின் பொறியியல் நிறுவனங்களும் இந்த வரி முறையால் பாதிக்கப்பட்டுள்ளன. அந்தத் துறையில் அமெரிக்காவுக்கான ஏற்றுமதி, 2025 இன் முதல் ஒன்பது மாதங்களில் சுமார் 9.5 சதவீதம் குறைந்துள்ளது. இயந்திர உற்பத்தித் துறையில், எஃகு மற்றும் அலுமினியம் பொருட்களுக்கு விதிக்கப்பட்டுள்ள 50 சதவீத அமெரிக்க வரி கூடுதல் அழுத்தத்தை ஏற்படுத்தியுள்ளது.
ரசாயனத் துறையிலும் அமெரிக்காவுக்கான ஏற்றுமதி சுமார் 9.5 சதவீதம் சரிந்துள்ளது. இருப்பினும், இதற்கு வரி விதிப்புகள் மட்டுமே காரணமல்ல என ஆய்வு குறிப்பிடுகிறது. ஜெர்மனியில் அதிகரித்துள்ள எரிசக்தி செலவுகள் காரணமாக உற்பத்தி குறைந்ததும், இந்த சரிவுக்கு ஒரு முக்கிய காரணமாக இருக்கலாம் என ஆய்வாளர்கள் கூறுகின்றனர்.
மொத்தமாகப் பார்க்கும்போது, 2025 ஆம் ஆண்டின் முதல் மூன்று காலாண்டுகளில் அமெரிக்காவுக்கான ஜெர்மன் ஏற்றுமதி ஆண்டுக்கு ஆண்டு அடிப்படையில் 7.8 சதவீதம் குறைந்துள்ளது. இதற்கு முந்தைய 2016 முதல் 2024 வரையிலான காலத்தில், இதே காலகட்டங்களில் சராசரியாக 5 சதவீத வளர்ச்சி காணப்பட்டிருந்தது குறிப்பிடத்தக்கது.
இந்த ஆய்வை மேற்கொண்ட சமீனா சுல்தான், “அமெரிக்க இறக்குமதி வரிகள், ட்ரம்ப் நிர்வாகத்திற்கு முந்தைய நிலைக்கு திரும்பும் வாய்ப்பு தற்போது இல்லை. எனவே, ஜெர்மன் ஏற்றுமதிக்கு விரைவான மீட்பு எதிர்பார்க்க முடியாது,” என தெரிவித்துள்ளார். இது, ஜெர்மன் ஏற்றுமதியாளர்களுக்கு ‘புதிய இயல்பு நிலை’ உருவாகிவிட்டதைக் காட்டுகிறது என்றும் அவர் கூறினார்.
இந்த சூழ்நிலை, ஜெர்மன் தொழில்துறைகள் அமெரிக்க சந்தையை நோக்கிய தங்களின் வர்த்தகத் திட்டங்களை மறுபரிசீலனை செய்ய வேண்டிய கட்டாயத்தை உருவாக்கி இருப்பதாக பொருளாதார வல்லுநர்கள் கருத்து தெரிவிக்கின்றனர்.
