வாஷிங்டன் ஜனவரி 08- வெனிசுலாவை நோக்கி காங்கிரஸின் அனுமதி இன்றி மேலும் ராணுவ நடவடிக்கைகள் எடுக்க முடியாத வகையில், அமெரிக்க அதிபர் டொனால்ட் டிரம்பின் அதிகாரங்களை கட்டுப்படுத்தும் தீர்மானம், அமெரிக்க மேல்சபையில் வியாழக்கிழமை வாக்கெடுப்புக்கு எடுத்துவரப்படுகிறது. இந்த தீர்மானம் மிகக் குறைந்த வாக்கு வித்தியாசத்தில் நிறைவேறும் வாய்ப்பு இருப்பதாக ஆதரவாளர்கள் தெரிவித்துள்ளனர்.
கராக்காஸில் நடைபெற்ற திடீர் ராணுவ நடவடிக்கையில் வெனிசுலா அதிபர் நிக்கோலஸ் மதுரோ கைதான சில நாட்களுக்குப் பிறகு இந்த வாக்கெடுப்பு நடைபெறுகிறது. கடந்த செப்டம்பர் மாதத்தில் வெனிசுலா கடற்கரை பகுதிகளில் நடந்த தாக்குதல்களைத் தொடர்ந்து, அந்த நாட்டின் மீது ராணுவ அழுத்தம் அதிகரிக்கப்பட்டது. இதன் பின்னணியில், போர்அதிகார சட்டத்தின் கீழ் பல தீர்மானங்கள் தொடர்ச்சியாக முன்வைக்கப்பட்டு வருகின்றன.
இதுவரை இந்த தீர்மானங்களை குடியரசுக் கட்சி தடுத்து வந்துள்ளது. இருப்பினும், கடந்த நவம்பர் மாத வாக்கெடுப்பில் 49–51 என்ற குறைந்த வித்தியாசத்தில் தீர்மானம் தோல்வியடைந்தது. அப்போது டிரம்பின் கட்சியைச் சேர்ந்த இரண்டு மேல்சபை உறுப்பினர்கள், ஜனநாயகக் கட்சியுடன் இணைந்து ஆதரவு தெரிவித்தனர். அந்த நேரத்தில், வெனிசுலாவில் ஆட்சி மாற்றம் அல்லது நிலப்பரப்பு தாக்குதல் எதுவும் திட்டமிடப்படவில்லை என நிர்வாகம் சட்டமன்ற உறுப்பினர்களுக்கு உறுதியளித்திருந்தது.
மதுரோ கைதானதற்குப் பின்னர், அந்த உறுதிமொழி உண்மைக்கு மாறானது என சில சட்டமன்ற உறுப்பினர்கள் குற்றம்சாட்டுகின்றனர். ஜனநாயகக் கட்சியினர் வெளிப்படையாகவும், சில குடியரசுக் கட்சி உறுப்பினர்கள் மறைமுகமாகவும் இந்த குற்றச்சாட்டுகளை முன்வைத்துள்ளனர். தீர்மானத்தை இணைந்து முன்வைக்கும் மேல்சபை உறுப்பினர்கள், முன்பு எதிர்த்திருந்த சில குடியரசுக் கட்சியினரும் தற்போது தங்களது நிலைப்பாட்டை மறுபரிசீலனை செய்து வருவதாக கூறுகின்றனர்.
தற்போது மேல்சபையில் டிரம்பின் கட்சிக்கு 53–47 என்ற பெரும்பான்மை உள்ளது. இந்த தீர்மானம் மேல்சபையில் நிறைவேறினாலும், அது சட்டமாக மாறுவதற்கு கீழ்சபையின் ஒப்புதல் அவசியம். மேலும், அதிபர் பயன்படுத்தக்கூடிய எதிர்ப்புத் தீர்மானத்தை மீற, இரு சபைகளிலும் மூன்றில் இரண்டு பங்கு பெரும்பான்மை தேவைப்படும்.
வெனிசுலாவில் நீண்டகாலமும் அதிக செலவும் கொண்ட ஆட்சி மாற்ற நடவடிக்கையில் அமெரிக்கா சிக்கக்கூடும் என்ற கவலை, சில குடியரசுக் கட்சி உறுப்பினர்களிடையே நிலவுகிறது. இதற்கிடையில், அமெரிக்க ராணுவ செலவினத்தை தற்போதைய அளவிலிருந்து மேலும் உயர்த்த விருப்பம் உள்ளதாக டிரம்ப் அறிவித்துள்ளார்.
மற்றொரு பக்கம், இந்த தீர்மானத்திற்கு எதிராக உள்ள மேல்சபை உறுப்பினர்கள், மதுரோ கைதானது ஒரு சட்ட அமலாக்க நடவடிக்கை மட்டுமே என்றும், அது முழுமையான போர் நடவடிக்கை அல்ல என்றும் வாதிடுகின்றனர். போதைப்பொருள் மற்றும் ஆயுத குற்றச்சாட்டுகளில் மதுரோ தற்போது அமெரிக்க நீதிமன்றத்தில் வழக்கை எதிர்கொண்டு வருகிறார்; குற்றச்சாட்டுகளை அவர் மறுத்துள்ளார். தேசிய பாதுகாப்பு கருதி, வரையறுக்கப்பட்ட அளவிலான ராணுவ நடவடிக்கைகள் எடுக்க அதிபருக்கு அரசமைப்புச் சட்டத்தின் கீழ் அதிகாரம் இருப்பதாகவும் அவர்கள் வலியுறுத்துகின்றனர்.
இந்த வாக்கெடுப்பு, அமெரிக்க அரசியலில் அதிபரின் ராணுவ அதிகாரமும் சட்டமன்றத்தின் அரசமைப்பு பொறுப்பும் எவ்வாறு சமநிலைப்படுத்தப்பட வேண்டும் என்பதைக் குறித்த முக்கிய சர்வதேச அரசியல் விவகாரமாக கருதப்படுகிறது.
